男仔最怕繁瑣小節，見到女仔護膚，搽呢樣塗嗰樣，真係心都煩晒。但係冇理由由得不拘小節的性格，搞到外表油頭粉面、繃緊粗糙。男仔要快招？得！小記請教咗Soler，原來只要有保濕啫喱，加埋磨砂呢兩個不可不做的EssentialSteps，就已經夠殺。各位男士，以後應該再冇藉口偷懶啦！
記者︰劉昱蘭
攝影︰陳陶鈞
Models︰Angela、Niki、Yammy、Stephy（Salvador）
〔護膚唔懶得〕
入行前，細佬Dino開始明白護膚的重要，全靠好友做美容師的女友細心推介。Dino︰「她見到我T-zone位好油，其餘就太乾，就介紹咗一啲Product畀我用，感覺同護膚前真係唔同晒，護膚就慢慢成為習慣。尤其係喺香港污染頗嚴重的地方，一唔用Product就好易又紅又痕，護膚真係唔懶得。」
大佬Julio鍾意玩設計，吸引佢護膚都係由Product嘅包裝開始。Julio︰「好多時見到啲細細支嘅護膚產品，太Feminine真係唔會想用。直至見到啲粗身啲嘅Product出現，令人覺得男人護膚都可以好Man，隨身帶住，喺街度拎出嚟用都冇問題。」
靚女們︰「男人易得，但靚仔難求，幾時先有件似樣嘅望吓？」
Gel頭基本功
〔型男裝備〕
1.Anti-Tightness清爽潔面啫喱$69（a）
含有薄荷配方，涼浸浸又唔會繃繃緊。
2.VitaLift緊膚抗皺潤膚霜$109（a）
一邊抗皺，一邊防曬，隔絕令皮膚衰老的紫外線。
3.HydraEnergetic保濕潤膚霜$109（a）
極易滲透皮膚不斷補水，而且有維他命C改善膚色。
4.Pure&Matte控油潤膚啫喱$89（a）
最啱鍾意運動的男仔，去油配方令皮膚保持清爽，油份平衡。
髮泥質地較硬，想髮型自然啲，可以用OUTOFBED凌亂造型膏，質地柔軟不乾透，可塑性高。$42.9（a）
特強定型防水啫喱最啱運動型男，啫喱防水配方，造型唔會塌落嚟，玩水上運動都可Keep住型。$49（a）
〔冧女有計〕
歌迷見到Soler即時螞蟻見到蜜糖，連吳日言都要找他倆拍MTV，就知二人的吸引力。原來型男真的有秘技，即check！
對付T-zone小貼士
不少男士都屬於混合性皮膚，就要注意T-zone位。T-zone位是油的發源地，但出油同時亦可以脫皮，解決方法是每次塗T-zone控油液前，先塗一層保濕Toner。有做面膜習慣的男士，亦最好將面膜分開兩部份，T-zone位用深層清潔類，兩頰則用保濕滋潤類。
〔濕身搽Gel〕
Soler試過護膚之後，就好似上癮咁停唔到。唔好睇佢哋日常護膚Steps好簡單，只不過係洗面加搽Gel，就以為就冇乜技巧，佢哋對Timing好有心得。
Julio︰「朝早出街前，夜晚沖完涼，呢兩個時段搽就最啱。尤其是係沖完涼一定要即刻搽，我未抹乾身都要搽咗先，因為沖熱水涼會令好多水份流失咗都唔覺，所以一定要立即保濕先得，而且沖涼唔可以用太熱嘅水。」Julio話除咗沖完涼要即時保濕，沖涼前都最好飲杯水補補水。
〔鼻翼做磨砂〕
女仔做Facial，又敷Mask又按摩又落精華素，男仔有心機照跟，就梗係效果顯著，但Soler覺得呢啲唔做都OK，但每星期最基本的磨砂護理，就點都唔少得。護膚都係想皮膚清新光滑，成面死皮皮膚暗啞，咁你話死唔死？所以每星期都必要磨走啲死皮，保持皮膚健康，先吸收到護膚品的營養。男仔切忌求其，有啲耐性每星期一次磨3分鐘，Dino話要特別注意最多死皮的鼻翼位。
〔桑拿清毛孔〕
其實都唔單止係藝人，香港人做嘢咁忙，好多人都會冇時間冇恒心做運動出一身汗，Julio又有好介紹，就係蒸氣浴或者桑拿Keep靚KeepFit。Julio︰「我本身做劇烈運動都好難出汗，做蒸氣浴就最啱，可以排汗，毛孔擴張咗又可以清潔埋。記住做完後要即搽保濕Gel。」的確深明護膚之道。
〔笑容check份量〕
Dino對搽幾多先夠就好有研究。Dino︰「搽Gel要分兩次搽，薄薄的先搽第一層，見到佢吸收晒，就再搽第二層。皮膚狀況成日唔同，每次都要自己Feel吓先知夠唔夠。」
齋靠Feel都係唔夠實質，Julio仲有好方法︰「搽完第二層Gel，就對鏡咧齒笑一笑，如果仲係好乾，你會Feel到拉住痛痛哋，咁就即係再要搽多啲先得。對住自己笑吓，仲可以放鬆吓，減吓壓。」
〔古龍水「沖涼」〕
皮膚乾淨，要細看先會好覺，想人一行埋嚟就Feel到的話，Dino覺得，古龍水係唔錯的選擇，因為香噴噴嘅嘢，總係令人覺得好乾淨舒服。可能因為佢哋細個見到爸爸的歐洲人客，個個都搽古龍水，覺得香味清新宜人，細個已經好鍾意，仲鍾意到偷嚟玩，試過有一次落咗好多喺身度，啲朋友行埋嚟，以為佢哋用古龍水沖涼！有時會自己慣咗隻味，唔覺唔覺愈噴愈多會好濁，所以要記住Keep住最初嗰時的份量。Dino，不如用淡香水啦！
a）L'oreal （28281437）
b）CarolinaHerrera（31884402）
c）ArmandBasi（23753823）
