蒙嘉慧拜李家鼎為師學習騎馬多時，由於早前忙於拍劇疏於練習，故近日難得有空便下定決心上馬苦練騎術，好友向海嵐見狀亦心癢癢一嘗騎馬滋味。師傅李家鼎為令兩名靚女學員上馬後心定，竟使出「前面有靚仔」招數，認真搞笑。
蒙嘉慧（YoYo）向來予人弱不禁風的感覺，近日她積極運動鍛煉身體，早前更拜李家鼎為師學習騎馬，日前她便相約好友向海嵐到元朗練習騎馬。
兩度墮馬
不過一身騎馬裝束、配備齊全的YoYo，自言雖然上了二十堂課，但因疏於練習，故每次上馬均有如新學員。
問她可有試過墮馬？YoYo說：「試過兩次喇！好彩都冇乜嘢事，不過都有少少驚，每次騎完出一身汗都好舒服。」師傅李家鼎則指YoYo有潛質但膽子小，為了令她鎮定下來，每次YoYo上馬後便不時對她說：「有靚仔喺前面呀！」鼎爺說：「佢話要媾仔嘛！所以咪話佢聽有靚仔囉，通常女仔就話有靚仔，男仔就話有靚女。」
心癢難熬
未知YoYo是否太過緊張，當日她騎了近一小時已筋疲力竭，但鼎爺依然不准她下馬。事後問YoYo是否十分辛苦時，她說：「OK喇！不過鼎爺真係好有心機教，好彩佢夠惡，我先唔敢偷懶。」YoYo又表示學騎馬除可以鍛煉身體外，將來拍劇有需要時亦可大派用場。
此外，向海嵐當日原本只是陪YoYo往練馬術，但曾於加拿大學騎馬的她到場後亦心癢癢，最後在鼎爺指導下上馬，向海嵐說：「喺加拿大時都有學過，咁我本身都好鍾意馬，不過好耐冇騎，今日YoYo話嚟所以咪陪佢嚟睇吓，難得鼎爺肯教我，我咪學吓。」
採訪：王崇穎 攝影：陳俊強
