港股擺脫日股影響，自由發展。日股散222點，港股欲跌還升，有8點進賬，1隻滙控（005）已經拖低恒指18點。上升股份數目係下跌股份嘅1.26倍，市場感覺仍然良好，冇乜大礙。
中信C輪3525：中信泰富（267）收22.95元，進賬0.15元。公司將喺下周三宣布全年業績，去年上半年盈利大增61%，有呢條靚數墊底，張全年成績表唔會失禮。舊年年頭到𠵱家，恒指升咗1499點（10.5%），中信只係升得0.85元（3.8%），落後咗，借住下周靚靚哋嘅成績表，股價料會醒神。買定啲C輪，有着數冇蝕底。
搵中信C輪落手，好容易，因為冇乜得揀，總之就係3525。隻輪8月初夠鐘，輪價14.2仙，溢價1.5%，槓桿率16.2倍（有效9.8倍），引伸波幅20.3%。中信C輪總共得3隻，其他兩隻4585與9692，買賣盞嘥氣。
中石化C輪2206：中石化（386）鍾意大反覆，過去5日，最低4.20元，三扒兩撥，前日上到4.55元，幅度高達8.3%。喺幾個巴仙股價波動中，拿揑得準，炒輪有魚有肉。
中石化昨收4.475元，跌兩格，吼住跌到4.40元，買C輪2206。摷勻晒，最靚係2206，6月尾夠鐘，輪價49仙，溢價3.2%，槓桿率9.1倍（有效6.3倍），引伸波幅34.4%。
章盛