當年梁詠琪（GiGi）和鄭伊健熱戀時，先後購入西貢匡湖居同一期的獨立屋，方便拍拖，但前晚這對過氣拖友各自出席宣傳活動後，則刻意相隔約一個鐘才前後腳返匡湖居，同途而陌路。
今年一月，拍拖七年的梁詠琪與鄭伊健正式宣布玩完，從前二人愛得轟烈，當初介入伊健和邵美琪之間的GiGi，背負狐狸精之名及冒事業直插谷底之危也要成為正印女友，其後伊健與GiGi更搬進西貢匡湖居為鄰，方便拍拖。
相隔一小時
伊健於○一年十月以約六百萬元購入匡湖居一期單號屋連船位，翌年GiGi亦以五百八十二萬購入上址同期獨立屋，兩人寓所只是一街之隔。熱戀期間日見夜見甜到漏，但如今就變得篤眼篤鼻。
前晚伊健到灣仔會展出席相機活動，晚上十時多便乘保母車返匡湖居，另一邊廂的GiGi則到中環出席MarcJacobs春夏時裝展，會後約十一時三十分，才坐保母車返匡湖居香閨。舊情人毗鄰而居，出入都要左閃右避，認真麻煩。不過，有消息指伊健為避GiGi已計劃搬竇，早前他曾秘密到加多利山睇屋，並看中兩個月租十萬及十三萬的三千呎單位，但暫時仍未拍板。
唔識人知瘀
此外，梁詠琪前晚到中環國際金融中心出席MarcJacobs時裝騷，她穿上價值三萬八千九百元的黑色長裙行天橋。早前美國雜誌《BAZAAR》指GiGi在香港LV晚宴上不識巴西名模GiseleBundchen，還失儀高聲打探，她說：「係好瘀呀，嗰晚公司已經話畀我聽有呢個人，但我大頭蝦唔記得囉，我係認得Gisele個樣，但當時講唔出佢個名，希望佢唔會怪我咁大懵啦，下次真係要將啲人名寫定晒喺手板上。」
GiGi在英國遊學五周期間，在港新聞依然不絕，對於有傳伊健與邵美琪復合，她說：「人哋嘅嘢我唔清楚。」另外，前晚有份行騷的徐子淇則力撐GiGi說：「我諗香港人十個之中都未有一個識Gisele，佢認唔出可以體諒。」
採訪、攝影：娛樂突發組、林妙萍、陳志嵐
