做藝人成日拍劇咁辛苦，最好嘅relax方法就係四圍食。平日開工捱飯盒當家常便飯的黎諾懿同沈穎婷，異口同聲︰「真係食到嘴都歪！」今次肚皮有福喇，二人互相分享咗佢哋至愛食肆，推介有乜必食之選，結果又再一次證實「男好大，女好骰」嘅定律，黎諾懿最愛大大件嘅三文魚扒，沈穎婷就話鍾意波子壽司夠的骰。
記者︰盧家蕙、方綺君
攝影︰林栢鈞
有大有細 悉隨尊便
「揀呢度因為好食又大份。」黎諾懿鍾意同朋友四圍食，由於一班朋友都係大胃王，所以食物份量少啲都唔得。一上菜，份量大到小記都嚇親，大大份唔單止有睇頭，最緊要係價錢抵食，又可以保持大師級水準，打破咗平嘢無好貨嘅定律。招牌菜三文魚刺身，應該叫三文魚扒，足半吋有多咁厚，黎諾懿至愛，不過沈穎婷則唱反調︰「我鍾意波子壽司，細細件一啖就可以放入口，啱晒嘴形。」
男女都讚Fresh！
咪睇黎諾懿牛高馬大，就以為佢乜都可以放入口。「其實我鍾意食原汁原味，新鮮啲嘅嘢，最好係少肉多菜。」日本料理最重用料新鮮，亦不會落太多調味，難怪深得黎諾懿歡心，「我本身好鍾意煮嘢食，因為入行後食無定時身體差咗，所以煮食都會清淡啲。」魚蝦蟹粥亦是二人叫好之選，好快就食清一鍋，沈穎婷︰「以前喺澳洲讀書時，成日都食到好新鮮嘅海鮮，返到嚟香港就少食咗，但呢度個海鮮粥好Fresh！」
成塊扒咁：三文魚刺身$60/6件
黎諾懿推介，三文魚有成半吋厚有多，抵食！
細細粒容易食：波子壽司$52/8件
圓碌碌非常趣致，女仔都可以一啖入口。
青龍卷$68/8件
壽司飯內包炸蝦、牛油果，上面再鋪蟹子，賣相一流。
豬骨逼出鮮味：魚蝦蟹粥$50
用蝦、膏蟹、三文魚水撥、蘆笋等材料，以豬骨湯底煮成。足料之餘，用豬骨煮啲鮮味出晒嚟。
食客有Say
黃小姐：啲嘢大件抵食，味道又好。
三路日本料理
地址︰香港灣仔道207號地下
電話︰21857805
味道西化 番書妹飯堂
對煮飯一頭霧水的沈穎婷，屋企無飯開時候就會到Cactus，「我比較鍾意食西餐，試過喺出面食扒，有渣質量又差。」黎諾懿一試︰「肉質軟，口感腍腍哋。」原來Cactus經理有外國經營西餐廳的經驗，所以要求將食物口味接近西化，啱晒外國返嚟嘅沈穎婷，「無錯，啱晒我胃口，所以我當呢度係飯堂，得閒會嚟食，仲介紹畀其他朋友。」
無渣㗎：炭燒頂級西冷扒$118/8安士
材料選用加拿大安格斯牛扒，配蒜茸汁或燒汁，肉質鮮嫩無渣。
食到笑晒：心太軟朱古力$43
外層蛋糕，包住內層軟心朱古力，配上呍呢拿雪糕。沈穎婷笑住口話︰「唔會太甜，一冷一熱好得意。」
食客有Say
歐陽先生：食咗個煙三文魚三文治teaset，廿幾蚊，好抵食。
Cactus
地址︰灣仔譚臣道98號運盛大廈地下B舖
電話︰21169701