以種族歧視問題為題材的美國電影《Crash》，在剛過去的奧斯卡頒獎禮中擊敗由李安執導的《斷背山》，成為最佳電影獎得主，可惜此片有了名卻沒有利潤滾滾來，在港上映的版權費開價僅七十八萬元亦無人問津，上映之日遙遙無期。
香港電影市道低迷，本地電影製作不斷減少，不少院商都要增購海外電影來應付片源不足的問題，但近日剛在美國奧斯卡力壓《斷背山》（BrokebackMountain）奪得最佳電影、最佳原著劇本和最佳剪接獎的《Crash》，因港發行商不看好票房，至今仍乏人問津。
導演慨歎
宣傳費嚇人難回本
其實由保羅赫基斯（PaulHaggis）導演的《Crash》可謂巨星如雲，包括有珊迪娜布洛（SandraBullock）、麥迪倫（MattDillon）及班頓費沙（BrendanFraser）等參演，但香港觀眾相信無緣在戲院欣賞此片。
據知《Crash》早前成為奧斯卡大熱時，影片在港的版權費叫價約二十萬美元（約一百五十六萬港元），但該片奪得奧斯卡最佳電影至今，仍然沒有人洽購版權，最近版權費已回落至十萬美元（約七十八萬港元），但半價出售一樣沒有發行商願意購買，最大原因是該片去年五月在美國上映後，去年十二月已有水貨DVD在港發售，雖然只有英文字幕，但對該片有興趣的觀眾相信早已在HMV等店舖購買DVD來看，因而打擊港發行商購買版權的意欲。
早已看過《Crash》的導演陳可辛表示不明白為何沒片商肯發行該片，他在電話中說：「其實呢部戲幾商業，我相信香港觀眾會感興趣，雖然我都認為呢部戲唔夠《斷背山》好，但都值得一睇嘅，不過𠵱家做戲院發行係幾難做，因為宣傳費好嚇人，一部大片最少要三百萬做宣傳，一般片都要百五萬，仲未計贊助費，冇錢做宣傳嘅電影根本冇得做，所以非主流電影幾乎冇生存空間，咁觀眾選擇只會愈嚟愈少，大公司如果再盲目喺宣傳費鬥大，遲早連主流電影都會受拖累。」
片商冷淡
「種族題材唔係咁受」
另一方面，記者昨日致電訪問專門發行外語片的GoldenScene公司負責人Winnie曾，她說：「𠵱家嘅電影發行生意好難做，一部外語片如果用二十萬美金買返嚟，就要喺香港收到六至七百萬港幣先可以回本，如果用十萬美金買返嚟，就要收到五百萬港幣先唔使蝕。
「我相信香港大部份發行商都唔肯買呢部戲（指《Crash》），係唔睇好呢部戲會收得太好，又有水貨出現，而種族題材香港觀眾又唔係咁受，我哋當然唔敢亂買。好似○四年攞奧斯卡最佳女主角查理絲泰朗（CharlizeTheron）嘅《美麗女狼》（Monster），香港一直冇人肯買，隔咗成年先至有片商買嚟上，票房都係好差。」根據資料顯示，《美麗女狼》在港上映時只收約二十多萬。
採訪：陳月媚