我期待重新打入香港市場的法國Citroen汽車，經已有好一段時間，事關佢哋旗下的新車系，經過咁多年蛻變之後，家陣由C1以至最新的C6豪華轎車，都好有自家風格；但講到筆者至喜歡，都要數到當中至的骰又Cute嘅C2啦！它的可愛在於樣子趣怪抵死之餘，車廂兩排四座位仲係獨立桶椅配搭，又有如一級方程式賽車的Sequential6前速+/-半自動波箱，最啱年輕小情侶駕着它去遊車河，而新近抵港的C21.4VTR車價仲唔使13萬，登時令我想向天大叫：「I'mlovingit！」
記者：陳偉林
攝影：黃子偉
模特兒：嵐、Liz
轉波好有打機Feel
我對Citroen這個汽車品牌咁在意，皆因筆者的某同事，曾擁有過一部好經典的2CV和有四輪液氣壓式懸掛的BX19；前者個罐頭軟篷頂稱得上係現今Roadster的先驅外，後者套避震在當年都可謂前無古人後無來者的前衞設計，對比於現有最新版的C21.4VTR身上，同樣有一個好圓渾的車體造型，而內在配搭上一台好慳油的1.4公升直4SOHC引擎，雖然馬力只得75匹，但起跑加速起來反應卻毫不輸蝕，加上同級車中絕無僅有的6前速+/-半自動波箱，夠順滑之餘，三幅式跑車軚環左右，仲有從賽車引申到來的推桿式轉檔輔助，操作起來簡直令人大呼過癮！
賣相我至正
昔日Citroen車款大多係尖頭蜢的低斜車首設計，接受否就見仁見智，惟時代不同，現今卻以圓渾見稱，而我最喜歡是C2甚有跑車色彩的四輪拋沙板設計，既吸引又悅目；再者，車身兩旁靠貼地面的裙腳，仲畀到你有平穩的觀感，至於話唔使額外付錢的原廠高置尾翼，襯番一對同樣係起方角的直立式尾燈，可以話係給人有Perfect的體驗。另多付$9,500更可換裝16吋跑車合金胎軨，與車身同色的鬼面罩和門邊鏡，效果係點？型啲囉！
全齊設備媲美高級車
咪睇C21.4VTR不過係時下歐洲城市小車，想不到車價唔使13萬的它，竟有齊電窗電鏡之餘，在賽車化數碼儀錶板下仲有可調校上下角度軚環，還有定速巡航裝置、電子恒溫冷氣系統同自動感應水撥。雖然C2只是四座位編排，但我就好欣賞前後四張座椅全屬跑車桶椅設計，予人妥貼之餘又夠承托力；其次，尾排本身重有座墊前後移動同摺叠功能，大可以騰出近倍的尾箱用來存放更多行李，你都咪話佢啲設備唔可以媲美任何一款高級轎車。
新車評級機構
加速 B
以一台只得1.4公升的直4SOHC引擎看來，起跑加速感都算唔錯，但尾段就略嫌一般。
轉向 B+
雖然從輪胎傳來的路面感唔算強，但以一部小巧的城市車而言，轉向反應算是好敏捷。
制動 A
傳統前碟後鼓制動器配搭，另加有同級鮮有的ABS及EBD等電子系統，收放得心應手。
傳動 A
一套Sequential6前速+/-半自動波箱，重可以好似賽車手咁以左右軚盤推桿轉檔，好玩又易操控。
舒適 A
全車前後四張獨立桶椅配搭，坐得貼服又夠承托力，連帶後排椅背亦一樣有角度調校。
耗油量 B
廠方數據是5.8L/100km，油費約每公里$0.75，但香港路面常要開車停車，結果未必有咁理想。
車廂噪音 B
若然以日常代步的話，車廂的寧靜度表現評價不俗，只係引擎在高轉下噪音略嫌偏高。
評分標準：我們根據記者試車後的感覺給予評分，最好為A+，最差為E-。
CitroenC2 1.4VTR 規格
引擎：1360cc直4SOHC
馬力：75ps/5400rpm
扭力：12.0kgm/3300rpm
傳動：6前速+/-半自動波
售價：$129,000（標準版）
車輛提供：雪朗汽車（28689999）
出車資料
車價：$129,000（標準版）
牌費：$3,929
保險：$20,019
（以0%NCB計算）
出車總計：$152,948
供車計算機
車價：$152,948
首期：$15,295
利率：5.5% 年期：4年
每月供款：$3,499×48期
（以上數據以HirePurchase計算及僅供參考）
同場加映：C21.6VTR標準版
先前首批20部特別版C21.6VTR大受歡迎，代理火速運來正版1.6VTR填補位置。兩款車差別只在於四輪跑車化懸掛，以及專用合金胎軨而已，還有車首標準化的鬼面罩設計。相信以其一台表現強悍的1.6公升直4DOHC引擎，配合埋6前速Sequential+/-半自動波箱，完全突出到部車本身火辣的一面。
售價：$148,500
