來自音樂世家的王菀之，尚未牙牙學語已懂得嘰哩咕嚕扮唱歌，怎料王菀之十歲時，家中一個平凡的三叉腳琴譜架竟然成了「兇器」，在一次意外中插爆了她的胳肋底，認真恐怖。
王菀之的父親是音樂指揮家，母親則唱古典歌曲。繼承了雙親的音樂細胞，王菀之尚未學說話已能哼出歌曲，每次隨家人外出歎茶，她即好像開籠雀一樣，向鄰枱茶客獻唱一千零一首飲歌——《平安夜》。
所有小孩子都會損手爛腳，但王菀之童年「創傷」可算慘烈，她笑道：「嗰陣唔夠十歲，企上屋企張梳化閂冷氣，之後仲要成個人傾斜，點知唔小心跌落嚟。」
小圈子遊戲
王菀之續說：「地下嗰個三叉腳譜架咁啱就插落我胳肋底，感覺係挑起我啲肉。我呱呱聲喊咗出嚟，即刻衝出廳話畀媽咪聽，媽咪猛話『爛晒』，哥哥又嗌『爛喇、流血喇』，好彩唔使入醫院，𠵱家都冇留疤痕。」
王菀之又表示小時候最愛玩「小圈子」，她說：「爹哋、媽咪返工，會擺我喺婆婆度，咁就喺婆婆屋企畫個圈，個圈有玩具、有嘢食。媽咪話我未夠兩歲時，試過肺炎入醫院，住咗兩個禮拜。」
小菀之重病，一家人憂心忡忡，王菀之說：「媽咪話佢每日嚟醫院睇我，每次走我都會喊。後尾好番，婆婆連我阿哥嘅奶粉錢都慳埋，買燕窩畀我當飯食補吓個肺，所以𠵱家嘅皮膚都OK。」
採訪：朱倬誼 童年相片提供：王菀之
