Hea：無罪入冊　跑碌架床

一世人流流長，無錢去嘅地方多的是，但有錢都去唔到嘅地方就只有──監獄。自小迷發哥，《監獄風雲》睇過N次，不過電影內的監獄場景同真實環境有乜分別從來唔知，域多利監獄搞開放日，我拉大隊扮囚犯踩場，先知道公眾監倉真係有一排排碌架床，身手好嘅話，真係可以學發哥咁跑碌架床㗎。

記者：許維雅
攝影：陳智良
模特兒：Kim、Tim、Janice、Gloria、Eugene、Chu

場景比拼：域多利監獄VS《監獄風雲》
1.球場平亂

放小息，各山頭趁機喺球場講數，傾唔埋欄即時打，保安主管出嚟平亂，要學《監獄風雲》張耀揚平亂一幕，唔難。

2.飯堂開拖

開飯，各山頭聚首一堂，你睥我我睥你唔順超又打，電影好多時有翻枱場面，但實地觀察枱腳全部用螺絲鎖住，無得翻。

3.獨立監倉

發哥喺《監獄風雲》內經常被人屈，所以要困獨立監倉（即水飯房），真實版域多利監獄的獨立監倉有2張床，唔多獨立噃。

4.廚房大鑊飯

戲入面犯人煮大鍋飯，真實版廚房一樣，煲呀、鍋呀都大過人，見識吓皇家大鑊飯都幾過癮，不過諗真，唔怕犯人落毒咩？

5.膠桶當廁所

未必上演到發哥開心洗廁所一幕，因為域多利監獄好多獨立監倉都無廁所，只有2個膠桶，一個解決大、一個解決細，慘！

6.乾淨醫院

監獄最平靜的地方就係醫院，開完片各大主角老例瞓番三五七日，真實版監獄醫院同戲入面的確幾似，仲好乾淨㖭。

監獄超過160年歷史

域多利監獄於1841年落成啟用，至今超過160年歷史，是大英帝國統治香港後第一棟興建的建築物，也是香港開埠早期的司法和執法中心，可收容438名犯人，至2005年12月23日停止運作，並早於1995年列為法定古迹。政府有意把具歷史價值的建築物發展成文物旅遊景點，所以在3月11日舉辦了第一日開放日，當日我10:00am拉隊入場，同行一身監犯獄警Look的模特兒不但成為小童軍隊、遊客、學生等全場焦點，更有港聞版記者上前要求訪問，氣氛超搞笑。
想去？明日與後日趁早喇，謹記，入場參觀要畀$20，所有善款全數作「更生」用途，擺低錢就可以參觀監獄D、E、F座、廚房、展品室及教堂。屆時除可欣賞懲教博物館展品、懲教署部門車輛及懲教工業產品外，更有真人穿着不同年代男女職員制服巡場，加埋銀樂隊及警犬表演，節目夠豐富嘞啩？