前國家總理朱鎔基當年一句「高薪養廉」，點出了國企積弱貪污惡習的癥結，擅於掌握國情的任總，昨日亦趁住兩會剛閉幕，在其專欄《觀點》內，暢論內地銀行業改革。任總話「論功行賞的僱員薪酬政策，是改革國有銀行激勵制度的重要元素」，簡言之，即係好似啲國際大銀行咁，員工要按表現有賞有罰，絕不手軟。
任總認為國有銀行需要全面檢討人力資源政策，包括招聘及免職政策，其中更重要是訂出論功行賞的薪酬制度，對僱員來說，必須有激勵制度，推動他們盡忠職守，爭取表現。咁又喺嘅，國有銀行近年一次復一次爆出醜聞，唔係違規貸款，就係高層穿阿公櫃桶，或者貪污受賄，總之鑊鑊新鮮鑊鑊甘，看來國有銀行唔從薪酬制度着手，很難真正推動改革。