話禮頓山係跑馬地嘅地標一啲都唔過份，皆因呢個盤造價硬淨，交投又多。啱啱又有一單，六座中層A單位，面積二千二百三十八呎，四房設計，以二千七百五十萬賣出，圍起每呎近一萬二千三百蚊，簡直拍得住中半山樓價。咁又難怪，許司長唔住山頂官邸都住喺度，係值錢啲嘅。 睇屋之島資料，萬二蚊一呎可以買到中半山地利根德閣三座或蔚皇居，南區可揀大潭紅山半島。