大教授張五常在蘋果《還斂集》一連十篇文章，大講人民幣「拋錨論」，大意是人民幣升值與否，實屬多餘。另一邊廂，楊懷康公在蘋果姊妹刊物《壹週刊》開火反擊。華山論劍高手過招，利世民從中偷師，實在獲益良多！
大教授嘅拋錨論，簡單講就係主張人民幣價值要同一籃子貨物掛鈎。大教授話以前人民幣與美金掛鈎，又加上格Sir英明領導，所以就帶來多年經濟暴升。不過話說回頭，呢個講法就等於接受一個事實︰聯儲局比人民銀行可信！
大教授冇講嘅係，通脹、自由貿易、資金流動呢三個政策目標，貨幣政策最多只可以同時調控兩樣。自從改革開放，自由貿易已經變成唔可以犧牲嘅國策。至於通脹，自從98年六四之後，中央對通脹都算係上咗寶貴一課，所以亦唔敢亂嚟。最後，人民銀行惟有扼殺資金流動，繼續推行外滙管制呢個不合時宜嘅政策。
好可惜，外滙管制呢種政策嘅漏洞，多不勝數。每日出出入入嘅自由行同胞，每日出出入入嘅外商台商港商……都會將人民幣同外滙帶出帶入，邊有可能管得咁多呢？
利世民就覺得楊社長提出嘅「水槍論」，對現實有更加貼切嘅描述。簡單講，水槍論嘅意思就係如果將槍嘴塞往，水槍入面嘅水始終會從裂縫中漏出來，再唔係就將水槍谷爆。𠵱家人民銀行水浸，利世民睇怕都係水槍漏水矣！
楊社長話水槍論其實都係大教授三十年前嘅傳世大作之一。真係令人感歎，莫非時間真係可以沖淡一切？就連信念同堅持都可以被時間沖淡？
利世民