呢排但凡關於電訊、媒體界新聞，唔係sunday就係now，唔係now就係8號仔，再唔係就係《信報》，彷彿香港哋真係得番小小超一條冷響呢幾個行頭橫行咁，噚日，佢個歡喜冤家王維基終於蒲頭，對八方嚟講，真係有啲恍如隔世。
咁魔鬼基搞咩？原來佢老哥long廚一個新寬頻服務bb20，諗住收大家168蚊1個月，意頭好但係貴過好多人，最重要係貴過李家二少。基哥承認，係因為見到二少最近推咗個18Mbps寬頻服務，所以咪將自己個bb10改為20Mbps的bb20，剛剛快過二少些小，咁佢自己個寬頻最極速係可以去到100Mbps，假如二少推個28，佢就整個35，如此類推，講得白啲，係睇住二少嚟打……反正做收費電視無機會贏佢，是但搵個位攞番個彩都好！
講開收費電視，二少個財經台下個星期一朝早就會響會展搞場啟播大龍鳳，基哥有冇好似其他傳媒巨頭咁收到英雄帖？佢話冇，而且仲問埋自己收費電視台同事，結果係大家都係冇。點解咁想收帖？好明顯係想「觀摩」，不過係觀摩人家個台花小飛俠林燕玲！基哥坦言，仲以為有機會同小飛俠影番張相。咁𠵱家帖都冇，唔知佢人生會唔會突然間好dry呢？
咁點解二少唔發帖畀魔鬼基？依八方推測，一，係會展地方細；二，係二少唔當基哥係傳媒巨頭，而假如呢兩個都錯嘅話，最大可能，惟有話二少原來怕鬼囉！
傳真︰2623-9278
電郵︰[email protected]