中移動雖則係飲「洋水」大（喺香港同美國上市），但話晒以內地生意為主，背景「紅」厚，所以由內到外都充滿中國味，唔使講其他，就好似噚日嗰業績會，場外招呼來賓嘅Buffet枱枱布紅噹噹，仲要擺幾個「囍」字嫁女茶壺做裝飾，場面喜慶到不得了。
唔單止場外一片紅，場內都祖國Feel十足，事關見傳媒前，例牌都要見吓班分析員，答問題、講未來，本來冇乜特別，不過華華聽到啲細行分析員爆料，話只係得美林、里昂同CSFB幾間大行獲欽點問問題，細行就無得問，場面似足國務院開會咁！
中移動派成績表，除咗一眾傳媒同分析員外，就連死對頭聯通兩個高層：IR副總曾宏建及公關部阿頭曹旭輝都有嚟踩場。知己知彼，聽吓對手講乜，睇吓有乜料到都好呀。
記者會上，最多人關心佢哋3G業務發展前景，十條問題有八條都係講呢樣，董事長王建宙開頭都好有耐性咁回應一下（答來答去都係舊料），之後追問得多，佢就索性話答咗唔再答。
之但係講到鈴聲下載服務，就好鬼興奮，不過到華華問佢自己用緊乜鈴聲？佢就只係識得哈哈哈，話自己成日轉，又話唔方便講，鬼咁神秘，唔知會唔會係《義勇軍進行曲》呢？
李華華
