到中國會食午飯，與窩輪專家Ｅ一起食燕窩鷓鴣粥，又食鵪鶉生菜包，食完先至醒起禮頓道搵到白鴿屍體，心裏為之一驚。窩輪Ｅ話：「唔使驚噃，煮到熟晒，唔怕會有禽流感。」咁又係，樣樣都怕，咪乜都唔好食？嗒真啲味道，中國會嘅燕窩鷓鴣粥似乎冇沙田馬場紫荊廳啲咁正。
問窩輪Ｅ：「你哋係唔係出咗一百個月糧？」窩輪Ｅ大笑：「發夢就有，最多花紅嘅，係M&A（收購合併）嘅老友，都冇一百個月吖。我哋發窩輪，賺得好少㗎咋，香港投資者非常成熟，買賣窩輪嘅人士，絕大部份係即日鮮投資客，唔會揸過夜，我哋計過，香港窩輪買賣，揸過夜得1%，即係話，我哋做發行商，賺時間值嘅機會，只有1%。香港人精明到咁，我哋點會賺到大錢。」
咦，星加坡又話諗盡辦法搶香港窩輪，得唔得呢？窩輪Ｅ話：「冇得諗，星加坡人唔係炒家，啲基金做對沖，梗係揀香港啦，我哋成交量大，有liquditiy吖嘛。反而南韓會升得好快，一來南韓股市興旺，指數屢創新高，二來南韓股民慣咗買賣options（期權），轉過頭來買賣窩輪，話咁易？」
南韓股民有冇香港人咁醒目，轉身快呀？窩輪Ｅ騎騎笑：「有成20%人揸過夜！」哦，發行商賺時間值機會大增，係香港二十倍，認真唔講得笑。最近有調查顯示，香港股民炒窩輪，輸多贏少，點解重有人炒？窩輪Ｅ話：「賺錢嘅唔會出聲嘅，恒指窩輪每日成交大，有人炒一隻恒輪，一日之內出出入入三四十次，郁一個價位就脫手，如果唔係，成交額邊有咁大吖！」
聽窩輪Ｅ之言，炒窩輪要金睛火眼吼實電腦先至掂，買咗收埋唔睇一兩日嘅話，賺錢只係靠運氣，而運氣通常好少發生在散戶身上！要做專業窩輪炒家呀，讀番幾本窩輪專著，然後交吓學費（即炒窩輪輸錢）先啦。