港台最有名兼最受歡迎嘅節目《獅子山下》，會喺五月十四日捲土重來，每逢星期日晚七點喺無綫播出。其中一集叫做「水中的故鄉」嘅故事，講述七五年政府建萬宜水庫嘅始末。
單單睇製作名錄，八方都覺得好勁，事關有金像獎最佳導演爾冬陞編導，演員方面就有呂頌賢同宣萱。除咗卡士，佢哋嘅攝製隊仲巴閉，事關喺水務署協助下，呂頌賢同成隊攝製隊（圖）直情潛咗入去水庫底拍攝，係萬宜水庫建立以嚟，首次容許嘅水中活動，真係好難得。
除咗陸續有新節目推出外，港台九月起會將每日播出嘅教育電視時段，由𠵱家嘅八個鐘減為四個鐘，同時會以通識教育為節目內容，一改以往作風，希望可以配合到教改新方向。
講真，港台電視節目水平一向唔差，據即將發表嘅電視欣賞指數結果顯示，○五年港台得分係72.44，比無綫、亞視同有線都高，連續七年排第一，而且佢哋去年亦喺國際間，攞咗成四十二個獎項，真係唔嘢少，如果再CUT佢哋錢，反而會影響節目嘅水準。
傳真︰2623-9278
電郵︰[email protected]