近排二三線股輪流炒，唔少炒高之後隨即批股，批完股稍回之後又再炒過，好似玩緊接火棒遊戲，確係令人有多少心寒，好彩暫時尚未見到大藍籌批股集資，否則又係大市即將見頂徵兆。
繼日前御泰國際（155）配股集資1.51億元後，昨日又輪到中國水務（855），市場傳聞隻股以0.96元定價配股，集資金額又係過億銀。
御泰昨日復牌，股價回落6.3％，收0.59元，但叫做險守配股價。經紀陳話，唔好睇小呢類二三線股，佢哋批股多數有芬佬接貨，若果單靠散戶，實在冇可能配售咁大批貨，抽到咁多水。
深控炒高話批股
另外，久違了的二線紅籌亦紛紛異動，昨日見到深圳控股（604）同航天科技（031）急升，其中深控勁升11.59%，收1.83元，至於航科更升15.69％，收0.59元。
經紀黃話，傳聞航科好事近，阿媽將於短期內公布有資產注入，至於深控就傳有證券行想幫佢配股集資。
慕容小初