嘩！孫柏文今次真係醒！隻金手指真係冇得頂！話說前日，我響公仔箱睇見二少和「黎．古惑拉」，來了場賺人熱淚的「斷背握」。又見到冬菇識做，遇到呢個情況，企埋一邊畀佢哋兩個繼續纏綿。令到我有感而發，問了一句：「這場鬧劇不是這樣收場吧？有冇搞錯，炒咗個編劇啦！」搞到我即刻諗吓其他領導人會點，結果寫了昨天的《九鐵事件，列根會點做》。
孫柏文只不過是利用前花旗國總統列根炒晒搞事分子的例子，去暗示給特區領導層有關人士，唔可以縱容造反，以及殺一儆百的重要性。點知，有關人士真係聰明，一睇完我篇嘢，俾我隻金手指篤醒之後，即刻做嘢。攞番「黎．古惑拉」一早簽咗，但係放喺櫃桶底嗰封辭職信出嚟，叫「實Q」睇住佢執嘢，然後拉閘放狗。所以如果大家想睇有前瞻性的文章，就一定要睇我孫柏文的金手指。煞有介事話呢件事「峯迴路轉」，只係啲冇遠見，同冇睇我孫柏文金手指嘅人先會說。
幫自己賣完廣告之後，想用今日的機會，去解答一些讀者的問題。有讀者問，如果想買實貨白銀，可以去邊度買。所以金手指亦做了點功課，為大家去篤一些買實貨白銀的渠道。摷咗一陣，孫柏文可以同大家講，原來香港很多金行，都可以為大家用現金實貨去進行黃金白銀買賣。一嚿Cash，一嚿白銀。要賣嘅時候就掉轉，一嚿白銀，一嚿Cash。我條針話︰「金行朋友好君真，又有彈性，賣金又得，賣銀又得，飾金都收。小至四錢一條鏈，大至一條十公斤金磚，通通有交易。」
最衰香港實在有太多金行，金手指唔可以淨係篤一間。大家都知我係全世界對實貨白銀最睇好嘅財經口水佬，所以希望睇到呢篇文嘅金行，自己識做喺金手指專欄附近登廣告，謝謝！
孫柏文