為咗促進中韓文化交流、迎接○八年北京奧運，同埋向全世界宣傳國際疫苗研究所（IVI）嘅活動同作用，IVI聯同中國國際友好聯絡會，準備下個月二十二號喺澳門運動場舉行「IVI基金募集中韓演唱會」，邀請中港澳同韓國藝人擔任表演嘉賓。
力邀大長今
而韓國方面已經落實嘅卡士一啲都唔弱，好似韓國組合神話、李孝利、Se7en、張娜拉同連生朴恩惠都會出席。聽聞主辦單位仲聯絡緊長今李英愛同韓尚宮梁美京，仲有韓國小天王Rain都係考慮之列，如果成事嘅話，一班長今fans同Rain迷想唔瘋狂至奇。
不過話時話，呢個演唱會門票比平時演唱會貴好多倍，票價分三千、二千、一千、五百同二百港紙五種，唔係人人負擔得起。
