樓價趨平穩，短期內都唔慌會大上大落，班換樓客開始蠢蠢欲動，周圍搵樓。將軍澳公屋、居屋以至私人樓乜都有齊，可以話係換樓活動最活躍嘅區份，撞正放盤業主同準買家都係換樓客嘅話，大家有共同目的，往往一拍即合，好快達成交易。
世紀21將軍澳廣場分行經理魏仕良，就做咗單類似嘅交易，有個住喺寶琳站附近居屋嘅業主，睇啱將軍澳中心十座一個五百八十呎嘅兩房盤，咁啱放盤業主打算兩房換三房。
買賣雙方都係區內嘅老街坊，加上大家都有換樓需要，於是業主將就啲平少少賣出，買家就爽快喺兩日之內落實交易，以一百八十二萬成交，呎價三千一百幾，低市價一成，比○二年十月買入價，微升五個巴仙，平手離場。