爆機狂迷：XBOX360午夜首賣　300人爭購逼爆反斗城

相隔三個月，行貨XBOX360在全球缺貨底下，仍可如期在港推出；宣傳攻勢鋪天蓋地，除咗噚日搵嚟Twins、Soler等人氣偶像撐場外，前晚更搞咗個午夜首賣會，以大量着數吸引機迷深宵排隊買機，卒之引嚟300機迷，逼爆皇室堡同玩具反斗城！
記者：徐影龍
攝影：何家亮

11:35PM
■踏入晚上11點幾，皇室堡門外已聚集超過150人。

11:55PM
■部份人龍被安排上二樓排隊，上下夾埋已超過250人。

00:20AM
■正式開賣後仍有不少機迷趕到，最後超過300人到場。

首賣會喺前晚午夜12點舉行，之前6點鐘已經開始有人排隊，人數唔算多，到8點幾仍只見到2、30人，記者暗忖今晚排隊人數應該唔過百啩！點知10點幾食完飯返嚟一睇，人數已貼近100，加上3位性感女郎同搶眼Cosplay周街派傳單造勢，令人數不斷增加，最後卒之搞到要分流部份人士上樓，喺玩具反斗城外排隊。最後點算人數超過300人，有啲喺半夜一點後仲仆過嚟買機，呢仗微軟可算攞盡頭彩！

■一開波賣機後，反斗城收銀處人頭湧湧，唔好忘記，當時係十二點幾！

■幾位性感XBOX女郎由傍晚開始周街派傳單，不少人駐足兼拍照留念。

其實首賣夜唔止賣機咁簡單，大會仲搞咗個狂歡派對，設立14部機座畀機迷試玩，當中包括重未在港公開嘅重頭作《N3》、《RumbleRoses》等，機迷玩得開心之餘，仲可同滿場飛嘅XBOX女郎、Cosplay等同場合照，玩到攰仲有汽水同點心招待，幾百人聚集喺反斗城玩個不停，可算相當之熱鬧！

■現場設立14台試玩機座，更有首次曝光嘅Game。

■XBOX女郎、Cosplay滿場飛，機迷爭相拍照留念。

現場擺放嘅14台試玩機座，唔單止有齊《GhostRecon》、《DOA4》等新Game，仲有從未在港公開嘅重頭大作《N3》、《RumbleRoses》等畀機迷試玩！

《N3》中譯《99夜》，畫面靚爆，賣點係同時出現過百敵人，主機處理能力弱啲都唔掂，擺到明Show機能之作。

豐滿靚女露肉上陣，仲要打擂台互炳，由於多邊形技巧高超，應圓嘅地方真係好圓！

三更半夜，居然重有商業二台《萬世巨星》DJILoveYouBoyz撐場，仲話係臨時決定殺落嚟買機；少爺占話至愛射擊Game，所以買硬《GhostRecon》，而Donald仲誇，帶埋朋友設計畀佢嘅XBOX360面板落嚟撐場，都算唔話得喇。

出現喺排隊人龍前三名人士，肯定成為傳媒採訪焦點，排頭位嘅Martin最大收穫唔係額外穫贈嘅禮品，反而係閃個不停嘅鎂光燈，排幾粒鐘隊仲要俾人問個不停，辛苦晒！

頭位：Martin(14年機齡)
一收工就落嚟，差唔多排咗6個鐘！今晚用咗三千幾蚊買機同Game，大會仲送咗《DOA4》大手掣、《GhostRecon》同Addias足球畀我，收穫豐富！

第2位：王先生(7年機齡)
我都係排咗6個鐘，緊接前面嗰位機迷，買Game連機就用咗成四千蚊，事關我一口氣買咗5隻Game，有排玩喇。

第3位：葉先生(20年機齡)
點解排隊買行貨？因為有保養囉！Game我只係買咗隻《DOA4》，排第二嘅王先生係我朋友，可以Share佢啲Game玩嘛！

售價：$2,959
包含內容：主機、硬碟、無線手掣、HD影像線、HeadSet、1個月LiveGold會費。
＊較廉價嘅淨主機套裝尚未正式推出。
查詢：800-964215

爆機狂迷：XBOX360午夜首賣 300人爭購逼爆反斗城

爆機狂迷：XBOX360午夜首賣　300人爭購逼爆反斗城