劉德華早前在昆明的草原拍綠茶廣告時，碰上牧羊人和羊群，導演於是借羊拍攝。正式開機時，羊仔二話不說就咀落華仔額頭，事後華仔指羊仔口水熱辣辣有味，是他拍過最難頂的親熱鏡頭。
劉德華早前到昆明峨山的雲茶山莊拍攝道地綠茶廣告，並在當地逗留了三日，廣告內容講述華仔遠離繁囂，到大自然茶園尋找創作靈感，並精挑茶葉泡茶。導演找來當地一班採茶女和華仔一起拍攝，眾人一邊採茶一邊唱歌，還有些小朋友參與拍攝，他們不時在現場嘻鬧和打交。
羊仔送上門
拍攝時有遇上羊群和牧羊人經過，導演即時嗌停機，華仔就叫牧羊人幫忙快些趕羊群經過，不要阻礙拍攝。
離開茶莊後，眾人去到大草原上拍攝時再次碰上牧羊人和羊群，導演忽發奇想就地取材拍攝，並叫工作人員向牧羊人借羊和華仔做對手戲，牧羊人借出一隻黑色小羊，導演叫華仔瞓在地上，拍攝羊仔和華仔對話的鏡頭，但羊仔一直咩咩大叫，不肯就犯，而到正式開機時，小羊二話不說就咀落華仔的額頭上，華仔被嚇了一跳，但導演未叫cut又不能縮開，所以露出古怪表情。
事後華仔笑說和羊仔的親吻鏡頭，是他一生中拍過最難頂的鏡頭，他說：「總共拍咗七take，隻羊仔居然唔出聲就咀落嚟，呢個真係世紀最難頂嘅親熱鏡頭。羊仔身上嘅羊味，真係唔識形容，佢咀落嚟重係熱辣辣，兼有羊口水。」
撰文：張止寒
