除咗九鐵管理層「逼宮」事件外，呢期市場焦點就要數連續六個月都冇勾地申請，而觸發官商罵戰嘅勾地表嘞。
蘭西收到風，發展商等到頸都長嘅新財政年度勾地表，今日出籠。暫定喺晏晝股市收市後公布。聽講新勾地表除咗剔出部份冇人吼嘅地皮之外，仲會加入多幅市區住宅靚地，其中何文田山谷道村地王，拆成幾件後，以靠近何文田體育館嘅佛光街同忠孝街交界地皮打頭陣，率先納入勾地表，估值成百億。
同係由房委會交還畀政府，位於油塘東隧出口、坐擁超無敵海景嘅前公屋地皮，亦隨時有機會放到表內。
講開勾地表，太古地產主席簡基富話，唔支持政府淨係考慮攞商業地嚟拍賣，若果要賣地就應該全面啲，即係賣埋住宅地。
簡基富：底價唔夠靈活
佢認為勾地制度係一個好好嘅構思，問題出喺政府在接受勾地價時唔夠靈活，發展商同政府對最低接受價嘅理解唔同，如果勾地價夠靈活，有地勾出，實會有發展商競投，咁地價就可以由番市場嚟決定，唔應該由某一個發展商或者政府決定。
簡基富話，太古對勾地表入面個別商業同住宅地皮都有興趣，係邊幅就唔講得。
長實執董趙國雄就唱反調，話政府可以考慮定期拍賣商業地，中環嘅地就梗係好，至於點解中環街市冇人勾，佢歸究係地契詳情未出，起到幾多樓面都唔知，計唔到數。
另外，蘭西噚日去咗測量師學會嘅飯局，新任產業測量組主席劉詩韻（資深測量師劉紹鈞個女）就話，希望新勾地表可以多元化一啲，推出唔同大細及用途嘅地皮畀發展商申請。佢話，好多中小型發展商土儲唔多，希望政府可以照顧吓佢哋嘅需要。
電郵地址：[email protected]