有愛美神飛彈之稱的黎姿前晚在灣仔出席Celine春夏騷，黎姿謙稱愛美神稱號是大家睇得起她，並指無意在幕前行性感。盛夏將至，黎姿自稱腳趾最性感，並打算穿涼鞋騷哥利。
黎姿和吳佩慈等前晚在灣仔欣賞法國時裝名牌Celine舉行的○六春夏新裝騷，二人不約而同與天橋上的模特兒撞衫，但有「愛美神飛彈」之稱的黎姿的身材卻不如模特兒般波濤洶湧；一身黑衣打扮的吳佩慈在黑色透視衫內戴上胸圍打底，性感程度即時減低。
黎姿笑言不再打算在幕前行性感，她說：「我冇膽着透視衫同比堅尼泳衣呀，夠膽着都一早去咗選美啦！我覺得自己最性感嘅部位係腳趾，所以一到夏天，我就會狂着涼鞋晒腳趾。」
對於愛美神飛彈的稱號，黎姿笑說：「係大家睇得起我啫，我從來都唔覺得自己犀利，就算夏天游水我都係着一件頭泳衣咋，我打算着比堅尼同透視衫嘅quota都留番畀將來老公睇，不過呢個人暫時未出現，可能一世都冇呢。」
吳佩慈擦星爺鞋
另一邊廂，吳佩慈表示更性感的打扮要留待自己的私人空間，極限就是穿胸圍示人。記者笑吳佩慈前晚收起咪咪，她笑說：「今晚（即前晚）凍嘛。」吳佩慈又透露將往上海及杭州拍攝周星馳創作劇本的電視劇，她說：「周星馳真人真係好有幽默感，佢好正經叫我吳小姐時，我已經想笑。」問她星爺是否她的杯中茶？她說：「咁又唔係，我鍾意啲短頭髮、陽光型嘅男仔。」
採訪：RitaLeung
攝影：RickyChan
