住宅特色單位大家就聽得多嘞，原來寫字樓都一樣大賣特色概念，點特別法，咪係連平台囉，所以買家幾日就落實入市。
呢個連平台單位係灣仔榮華商業大廈四樓B室，約七百五十呎，平台約一百五十呎，以一百七十八萬交吉售出，呎價二千三百七十三。
中原香港商業部營業董事陳叔仲表示，單位內置洗手間，做飲食都得，仲好夠特色㖭。買家睇完樓，諗咗三日就嗱嗱聲入市。業主係投資者，一直揸住收租，約滿後轉為放售。
榮華商業大廈僅得四樓A同B室附設平台，而樓上高層單位，叫緊每呎二千八。
寫字樓除買賣旺，租務都唔差，中原工商部營業經理陳錦雄話，葵芳新都廣場二座十八樓全層，月租二十六萬四千蚊成咗，一萬五千五百四十三呎，呎租十七蚊。