亞視下星期開拍電視劇《情陷夜中環2》，內容係講地產界嘅明爭暗鬥，上集班底大部份都會上陣，葉璇同張文慈（Pinky）扮演一對內地姊妹花，亞視原本安排馮寶寶同羅家英扮演佢哋嘅父母。不過馮仁昭收到風馮寶寶嘅角色將由前金馬影后金燕玲取替，聽講呢次臨陣易角，係因為製作組擔心有情緒問題嘅馮寶寶會影響拍攝程序。
家英哥原本好期望同馮寶寶大鬥演技，對於臨時被換老婆，佢噚日喺電話度話：「金燕玲都好嘢喎，佢扮風騷女人好正，我雖然冇同佢合作過，但好欣賞佢啲戲，佢喺《半支煙》做得好。」
四哥好艷福
問到家英哥會唔會同金燕玲有床上戲，佢抵死咁話：「咁要睇導演識唔識做，我次次淨係得個想字，不過我哋扮老夫老妻，床上戲就冇嘅多，嗌交戲就有份。」家英哥又自爆劇情會交代佢有一名情婦，佢話唔知自己有冇四哥上次咁好艷福，可以同Pinky有床上戲，家英哥話：「我唔識拍調情戲，有得拍嘅話我要請教四哥，佢叫我要戴黑超做都冇問題。」
