煲呔識玩親民，又好醒目咁搵咗spindoctor幫手搞包裝，遇有衰嘢時又識左閃右避，難怪香港接連有大鑊嘢發生，佢都冇事，受歡迎程度有增無減。咁樣對佢梗係好，但對於一個政治漫畫家，就真係嚡嚡聲喇！好似尊子都呻，𠵱家真係好難將個箭靶放喺佢身上，言下之意，即係可以畫嘅議題少咗，又即係市民少咗共鳴，咁即係生意難做，難怪尊子只有苦笑啦。
身為香江頂級政治漫畫家，由尊子講出生意難撈，當然最有說服力。尊子覺得煲呔上場一年，市民心情好轉，好難再好似老董時期，會有幾十萬人上街呢啲熱情，而且市民鍾意佢，佢出少少錯，市民都唔會怪佢，更何況煲呔有啲左右護法幫佢度橋，又點會搞到自己一身蟻？所以尊子要搵素材都好頭痕㗎。
現時只係沉默嘅角力
既然政治氣氛咁沉悶，尊子惟有休息一陣再衝刺。乜叫衝刺期？咪就係等七月一日囉。雖然香港呢輪講普選嘅人少咗，市民熱情好似冷卻咗，但尊子反而認為，呢啲嘢，唔可以永遠有高潮，要保吓溫，佢覺得𠵱家可能係一種沉默嘅角力，戰事雖然拉長咗，但只要啲有心人出嚟透吓火，普選熱心又會燃燒，所以尊子𠵱家要儲定彈藥，留待7.1再發功。
當然，煲呔嚟緊要搞連任，搞連任即係要有小動作啦，只要稍有差池，都可以借題發揮，尊子唔使擔心冇嘢撈；事實上佢真係唔驚噃，仲忍唔住口話，𠵱家仲有好多時間吖，遲早佢實整單大鑊嘢出嚟。迷信嘅煲呔，一定整個陣出嚟邪一邪呢個咒語。
近年畫嘅政治人物中，尊子覺得老董好易畫，因為一個肥嘟嘟老人加多幾條皺紋就搞掂。陳四萬都易，幫佢SET個靚頭笑笑口就掂晒。唐唐面長，好明顯提供咗一個畫畫素材；肥龍難度高啲，事關佢唔多蒲頭，市民唔記得佢係乜水，唔似煲呔一畫「煲呔」就人人都識。
咁同老董一樣肥嘟嘟嘅肥平呢？尊子話佢係多嘢衰，可惜唔係太影響大眾，淨係文化界眼火爆啫，但又不忘補充句：如果佢轉做特首就最好喇，我實多幾個專欄。到時佢就梗係發達，肥平就一定俾佢激死。
傳真︰2623-9278
電郵︰[email protected]