截到前日嘅過去5日，恒指喺15500上下浮沉，淡氣迫人。昨日，個市就出其不意彈升200點，就係鍾意玩反底遊戲。中移動（941）與滙控（005），啱啱總共拉高恒指100點，又啱啱包咗恒指升幅嘅1半。
期指升291點，低水44點。滙控下周二除息2.42元，恒生（011）本周五除息1.90元。兩大銀行股息相等恒指97點，所以期指實際高水53點。
恒指C輪2209：3月份夠鐘嘅恒指末日C輪，最勁者單日急飛79%（9601）、92%（9375）同116%（9639）。賭呢啲槓桿率極大嘅末日C輪，食得鹹魚抵得渴，要預咗大生大死。
認為個市仲會炒上去，向恒指C輪埋手，唔想太搏殺，諗2209。隻輪6月29日夠鐘，溢價1.9%，槓桿率19.4倍（有效11.9倍），引伸波幅18.5%。
滙控C輪9607：昨日推介滙控C輪9607，只升得4仙。升得最勁者（講輪價嘅仙位幅度）係4885同3400，各彈11仙，其他升7-8仙嘅亦有好多隻。
9607升得咁渣斗，即係點？要加碼咯！事實上，睇吓個比較表，9607因為升得較小，結合時間、各種數據等因素，最靚係佢。
章盛