將軍澳居屋多籮籮，以鄰近地鐵站嘅屋苑最吃香，好似喺坑口站隔籬嘅安寧花園，交通方便附近又有大型商場，社區配套同私人樓差唔多，價錢平一大截。就以啱啱成交嘅低層單位為例，面積約五百呎，連補地價以一百二十萬成咗，呎價二千四，個價雖然比同類單位高五個巴仙，但相對附近私人屋苑，呎價動輒三千幾四千，仍低三、四成。唔怪得安寧花園每個月平均有十宗買賣，同區內中型私人屋苑看齊。
安寧花園𠵱家咁受追捧，相信好多人都淡忘咗呢個居屋，一度受沉降問題困擾，引發唔少投訴，不過，受到比沉降問題更嚴重嘅沙士影響，九龍灣淘大花園E座買賣，一樣有能力起死回生，區區沉降，又點會打擊港人嘅買樓意欲。