中原在野股東王文彥除咗有中原股份外，自己另外有檔怡居地產，希望可以實踐佢嘅經營理念，由於佢好多時對樓市睇得比較淡，故有樓市淡友之稱，做代理又做淡友，都幾獨特。
蘭西收到風，話怡居沙田兩間分行最近頂咗畀新晉代理集團，其一喺沙田好運中心，另一間喺沙田第一城。睇怡居嘅網頁介紹，公司共有一間總行同四間分行，主要喺鰂魚涌太古城同沙田區。若頂咗兩間分行出去，得番三間，遲啲會點呢？
蘭西打電話又傳真畀王文彥，問佢點解有咁嘅決定，但係仲未收到回覆。唔知王生係咪貫徹佢睇淡嘅精神，索性縮減分行，抑或係「不愛江山愛美人」，想多啲時間陪行內稱為「怡居老闆娘」嘅太座？
王文彥上個月初喺中原網頁上講，今年樓市調整期會較長，可能要到下半年至告一段落。若有乜突發嘢，調整期仲會延長啲㖭。按舊年十一月初樓價水平，估計今年二手中小型住宅最少跌兩成，豪宅就逾三成；一手跌幅較二手更大，一啲定價偏高嘅一手豪宅甚至可能跌逾四成。樓價下跌，仲可能引發一手撻定危機㖭。另外，因少咗炒家同投資者支持，又估今年整體買賣會比舊年少約兩成，得十萬宗，一手佔萬二。睇完真係令人心都淡埋。
講番頂咗怡居舖位嘅新晉代理集團，市傳係由大行出嚟自立門戶嘅高層組成，仲傳到有上市公司資金背景㖭，總之就係消息滿天飛啦，聽講好運中心間分行就快開張。蘭西噚日去好運中心睇過，間分行都搞得七七八八，個公司名就用張紅紙封住。市場又有新代理行搶食，睇怕最唔想見到嘅肯定係兩大代理集團。
電郵地址：[email protected]
