港股噚日大幅回升，今次調整市應該告一段落，藍籌股好多已升破下降軌，確認浪底已出現，未來一兩個禮拜，恒指會再向16000大關推進，在高位略作整固後，可再開展新上升浪。
芬佬話個市落唔到，仲話唔好睇得太淡，果然一挾就大升200點，H指亦上升96點。期指更勁，大升291點，低水收窄到只有44點，大戶好明顯係造好。藍籌同中資股先後發力，到16000大關回氣之時，二三線股就會接力而上。
除中資股成為熱捧對象外，呢輪好多優質二三線股都被發掘出來，升幅以倍計，投資者繼續熱衷尋寶，德泰中華投資（2324）係可以留意嘅股份，噚日收0.83元，升2仙，聽聞公司在集資後會有大動作，股價有機會升越1.2元。
德泰前身係北方企業投資基金，今年1月改名，剔除「基金」稱號，使股價能真正反映作為投資管理公司的前景，而不會受制於每股資產淨值。德泰今年1月底時資產淨值0.625元，現時股價已遠遠拋離。
可能進軍金礦業務
集團剛剛做完披成，以每股0.75元，配售1730萬股，集資淨額1250萬元，股份由機構投資者接去。德泰「晒士」唔大，今次配售後，發行股數亦只係1.14億股，市值僅9500萬元，做成一兩單大deal，已可將股價推上幾層樓。
德泰專注內地直接投資項目，主要係電訊同金融行業，預期目標係要有3倍盈利增長。公司上市3年，現時持有的6個項目，有兩個今年將踏入收成期，帶來可觀貢獻。
德泰集資後，相信會進軍金礦業務，點解咁諗？德泰現時持有中國北方金銀業有限公司（CNIBullion）30%權益，而CNI的內地夥伴係上海金創黃金有限公司，其母公司山東金創在山東擁有不少金礦，亦係全中國金礦最集中的地方（約佔全國兩成）。德泰憑着與金創的關係，沾手金礦業務，順理成章。
本港現時有兩隻金礦股，分別係紫金（2899）同靈寶（3330），兩股都已大升；德泰若「染金」，亦會令人刮目相看。
郭兆誠