各位中環白領有冇諗過，喺香港金融圈中，「股佬」多抑或「賓卡」多？
金管局最近有篇專題文章，探討香港同紐約金融業嘅產值，裏面提到，根據03年數據，本港銀行業員工有7.15萬人，領先其他金融行業；證券與其他金融投資及有關服務業就容納咗5.53萬人，保險從業員則有4萬人，加加埋埋，靠金融服務業謀生嘅就有16.68萬人，雖然只佔整體就業人數嘅5%，但佔本港嘅GDP就有成12%。
大蘋果紐約又點呢？紐約金融業僱用人數係香港嘅兩倍，03年嗰陣有31.8萬，金融業產值唔單只係香港嘅四倍，而且佔紐約本市生產總值比重高達27%。香港同紐約差距最大嘅係證券業，紐約受僱於證券行嘅有近17萬人，係香港嘅兩倍，產值則是香港嘅10倍多。