雖然銀行、發展商加埋地產代理齊齊打補針，個市始終都係麻麻哋，用家都係觀望嘅居多。唔少諗住博新年後有水位賺嘅炒家，手上嘅貨沽出去又賺唔多，有啲索性上埋會炒中長線，又或者銀碼細嘅，好似屯門一百萬樓下嘅單位，好多炒家都會一筆過畀晒錢，等到個市旺番啲先甩手，賺到佢盡，而喺未賣出件貨期間，就出租當收息。
祥益張才權話，屯門市廣場八座一個四百二十五呎單位，炒家舊年八十萬買入，𠵱家市價只係九十萬左右，水位唔多，三千八蚊租佢出去先，回報率近六厘。
講開又講，屯門市廣場交通購物方便，租務好活躍吓，租金回報都唔錯，好似四座一個五百四十九呎單位，近排就以四千六蚊租出，以市價一百零五萬左右計，回報五厘三。