汪明荃及陳慧琳前日在尖沙嘴一酒吧拍攝新歌《自由女神》MV，阿姐穿上火紅色低胸裙，陳慧琳則以紅白裙配襯。兩位阿姐級人馬碰頭，引來大批傳媒採訪，令酒吧擠得水洩不通，更惹起酒吧經理不滿。
汪明荃及陳慧琳（Kelly）最近合唱新歌《自由女神》，前日她們到尖沙嘴諾士佛臺一酒吧拍攝MV，據知她們拍攝的時間較預期遲，加上有大批傳媒採訪，導致現場擠得水洩不通，令該酒吧的經理非常不滿，並破口大罵工作人員及傳媒，嚇得正在拍照的阿姐及Kelly目瞪口呆。
跟阿姐學談吐
阿姐當日穿上火紅色低胸裙，Kelly亦十分識趣地以紅白裙相襯，Kelly笑說：「日後出席呢個MV嘅宣傳活動，我都會打電話畀阿姐夾衫。」問到Kelly同阿姐之間誰較搶鏡，Kelly即謙虛地說：「梗係阿姐，成首歌佢都搶晒（鏡）。」問她可會介意？Kelly說：「有機會同阿姐合作都好開心。」提及阿姐要求甚高，可有擔心未能滿足對方？Kelly說：「阿姐個人嚴謹，喺佢身上學唔少嘢，睇佢接受訪問，唔講廢話，談吐大方，所以要向佢學習。」
望與青霞合作
再問Kelly想跟哪些藝人合作，她說：「男就係發哥（周潤發），拍戲都OK，如果佢肯開金口仲得，而女方面就有芳芳姐（蕭芳芳）同林青霞，不過林青霞應該冇機會，佢都收山喇。」
阿姐前日大讚Kelly後生靚女，她說：「每個女人都有唔同嘅地方同埋味道，今次合作都OK，效果幾好，開頭都有擔心兩把聲有啲似，但𠵱家出嚟有唔同嘅分別。」
採訪：楊潔雯 攝影：陳志嵐
