噚日截標嘅銅鑼灣開平道一至三號商住地，代理仲記話反應熱烈，其他嘢無可奉告。睇嚟如果業主冇吊高嚟賣，沽出嘅機會都幾大，熱門買家梗係舊年尾用兩億八千萬買咗隔籬地盤嘅業主，市傳係銅鑼灣最大地主希慎利氏家族。
開平道一至三號佔地大約四千呎，一號𠵱家有幢六層高綜合用途舊樓，七四年落成，三號做緊公眾停車場。隔籬嘅五至五A唐樓，舊年以每呎樓面地價五千三百幾賣出，相信係一至三號最直接嘅參考價，以商廈最高十五倍地積比率計，可建樓面約六萬呎，涉及大約三億二千萬。
資料顯示，開平道五至五A嘅買家，係領地投資有限公司，董事湯允衡，表面同希慎利氏家族無關，不過市場盛傳佢係利家嘅幕後買手。
可能呢個盤嘅潛在買家太呼之欲出，一般人入標意欲唔大，連最積極喺銅鑼灣搵盤嘅投資者阿爺吳鎮科，都話冇興趣。