新世界發展董事總經理鄭家純（圖）以往喜歡四處投資，曾經令新世界債台高築，要彤叔鄭裕彤親自出馬收拾殘局，但經一事長一智，今時今日嘅純官，處事似乎成熟咗好多。
好似噚日新世界發展公布業績，純官主持大局，俾記者行家問到澳門呢期咁掂，新世界有冇考慮過大海搵商機？純官好認真咁答，澳門的確發展興旺有商機，旗下協興都接咗70億元嘅工程定單，不過，對於新世界嚟講，𠵱家先入澳門市場會唔會太遲或者已經係水尾呢？識得咁諗，純官真係好難得。
咁仲唔止噃，當有記者問純官，近排新世界成日俾對沖基金「搞」，有乜對策？佢好淡定咁話，歡迎基金同所有投資者投資新世界嘅股票，皆因新世界有升值潛力，又有實力，絕對唔怕有人衝擊！前排細路仔基金曾持有新世界5%以上，純官話管理層冇同細路仔基金接觸過。
當然啦，正所謂「細路仔唔識新世界」，使乜出動到管理層同佢傾吖，使橫手咪得囉。