梁靖琪（Toby）的中文名諧音「梁靜奇」，她經常跳跳紮而弄得周身傷，七歲牛一當天，Toby與玩伴玩「耍盲雞」時不慎撞傷下顎，血流如注，止血用的毛巾由白變紅，到醫院縫針時，她竟不哭不扭計，「靜到出奇」。
梁靖琪有個當無綫高層的爸爸梁家樹（監製兼戲劇分部助理總監），母親蕭笑鳴（芭姐）也曾當無綫藝員部經理，難怪甫出道已是風頭躉。
Toby的童年，一樣過得非常精采，因為她小時候分別在香港和加拿大度過，接受兩地不同文化教育，培養了她活潑開朗的性格，迹近頑皮的她經常跳跳紮冇時停，終於玩出禍，在她七歲牛一當天「見紅」，認真贈興！
撞向床角
事發當天，Toby相約一大班小朋友到家中開生日會，大夥兒還躲在她的閨房裏玩「耍盲雞」，由壽星女負責抓人。被蒙住雙眼的Toby「生擒」了一名小男孩，怎知對方大力甩開她，Toby即應聲撞向床角，下顎登時被割開，血流如注，嚇得大家都呆了。
Toby說：「整親我嗰個男仔淨係識攞條毛巾幫我止血，結果條毛巾由白色吸到變咗紅色，都幾驚㗎，我就係咁喊囉！」Toby的哭聲驚動了媽媽蕭笑鳴，立即把她送院急救。Toby說：「可能我平時成日受傷，都慣咗，縫針都冇喊，嗰次最後縫咗九針，好彩個傷口喺下顎底，唔係好覺眼。」
偷飲香檳
講完流血事件，再問Toby還有甚麼童年瘀事，她說：「有一年喺加拿大過聖誕，我貪玩靜雞雞偷飲香檳，飲咗幾啖就醉咗，喺個地下典嚟典去，一時又唱歌，好鬼high咁，媽咪睇見都笑到碌地，佢因為顧住笑，所以冇罰我。」
採訪：比華利
部份圖片提供：梁靖琪
