自從滙豐二月減息搶按揭生意之後，唔少銀行都陸續做嘢，可以畀少啲息，最開心唔係置業人士，而係地產經紀！中原執董陳永傑（圖）話，愈戰愈開心，不過啲息最平未必一定最好，所以佢唔會好似對手咁，一味只係篩選最低息嘅按揭比啲客，寧可貨比多間，等班客自己揀。
講開買樓，陳董話前日幫朋友買咗君滙港個六百呎單位，問多兩句就變咗係同屋企人買，最後先話自己買。又話呢半年樓價只係回咗6%左右，最好就係長線收租，穩陣過短炒，事關一買一賣，計入經紀雜費，冇乜肉食。咁咪倒自己米?
問佢手上仲有幾多貨？佢笑笑口話七成係住宅，三成係一千萬以下嘅中型商場舖，港九新界都有，之後又話手上兩三間商舖（咁住宅咪有成六七間），都係96至97年買落，計吓數跌咗四成。