九龍倉副主席吳天海噚日擔大旗，主持九倉嘅業績記者會同分析員會議，眾所周知，吳天海一直只係負責有線電視同九倉新電訊嘅生意，九倉成盤生意唔係咁關佢事，出現咁大嘅轉變，背後一定有啲嘢啦。
吳天海噚日好坦白咁講，以後會同主席吳光正分工，「粗重」嘅日常業務由佢管；主席就做番主席要做嘅嘢。咁啱最近九鐵爆出主席同署理行政總裁不咬弦，要講分工。吳天海都忍唔住自己笑自己講呢番話實在「應景」。
華華就比較關心今年先至60歲嘅吳光正未來有乜搞作，佢02年初先返九倉做番主席，其後大力搞集團重組，到𠵱家只有四年貨仔，咁快又將自己升上神枱，叫吳天海出嚟打點一切，難免給人無限想像空間。
不過，自從參選首屆特首失敗之後，佢多次表明自己無意再選特首，唔通佢突然又心郁郁，想開始儲彈藥，打算重投政治圈嘅懷抱？點都好，吳光正推吳天海出嚟打理九倉，對股民同華華嚟講，一定係好事。
事關吳光正時代，九倉從未為講解業績開記者會。吳天海擔大旗後，噚日即開記者會，佢仲識利用同系公司嘅資源，響有線電視嘅直播室見記者，直播出街，實行將九倉嘅透明度推至最高峯，仲勁過田二少。
李華華
讀者如有任何意見或報料，歡迎發送電郵至[email protected]。