九鐵呢套兵變劇真係好睇，重要係免費。不過計落又唔係免費得晒喎，大家計下數：540+428+423+280+413+256等於幾多？答案係2340。即係兵變六人幫總年薪係二千三百四十萬。我哋其實用咗二千幾萬請呢六個人去搞兵變，所以呢套戲嘅票價其實好貴。
當年林彪都有套兵變計劃對付毛澤東，個計劃叫五七一工程，五七一者用普通話念即係武起義咁解。今次九鐵六人幫兵變之日係三月九日，咁可能係三九起義咁解。佢哋揀呢日可能係指三九起義日，九鐵重生時。
兵變唔一定係唔好，例如第二次世界大戰期間曾經有一班將軍要捉希特拉但係唔成事仲俾佢拉去打靶。嗱，嗰次兵變如果成功就可以救番好多人條命，可惜唔成功啫。
古今中外，凡兵變事敗者必打靶。咁都唔打靶仲得了？下面班細嘅咪有樣學樣？
咁六人幫使唔使打靶？我睇係遲早嘅事。香港大把公營機構，一陣又三九起義，一陣又九三暴動咁朝廷咪好唔得掂？
我成日都唔明，點解人一到高位就會特別蠢嘅？你明知嗰個少爺仔係朝廷派嚟嘅，你郁佢咪即係郁朝廷？朝廷會點睇你？
𠵱家朝廷叫個少爺留低，咪即係打你靶囉。個少爺都睇到呢點，所以以退為進囉。仲有呀，班細嘅特別係唔知搞兵變嘅以後會點睇你六人幫呀？朝廷一定會話唔會秋後算賬燒咗張名單，然後少爺提升佢信得過嘅人做大將軍。
最後兵變六人幫自己打自己靶。
一場鬧劇就此落幕。
教訓係：以後搞兵變要專業啲。
得嘅係：全港市民都識得你。
唔識搞喜劇，只懂搞鬧劇，呢樣就係香港文化。
觀火
傳真︰2623-9278
電郵︰[email protected]