八方早前寫過，工聯會鄺大狀同職工盟阿石，兩個人明明情投意合，有意組黨，可惜各自有個包袱放唔低，唔可以結合，好明顯係一對斷背男。
原來呢個形容詞，喺政圈都有好多迴響，鄺大狀就話，嗰日見到八方咁樣話自己，都唔敢睇，點知身邊嘅嫻姐就笑到碌地，話好好笑，就連有次見到馬仔亨局長，都叫佢做斷背男咁盞鬼。身為主角，都難抵誘惑，最後尾都攞咗嚟睇睇，事後發現唔係好猥瑣，反而好得意，真係大叫好彩。
八方問佢𠵱家組黨搞成點，唔問由自可，一問就死火，鄺大狀都係一副冇晒計咁款，話真係要等大佬，即係工聯會高層定奪。𠵱家睇嚟，就梗係機會唔大，唔可以同阿石雙雙斷背去也啦。
據知工聯會定咗喺下個月二十二號改選，領導層都唔會點變，都係棠哥冧莊。棠哥之前成日話組黨係煲水；至於煲水會唔會滾，真係要睇佢肯唔肯開火喇。
傳真︰2623-9278
電郵︰[email protected]