前日溫總話以前嗰種一次性人民幣或升或降的事情不會再存在，亦唔會有出其不意的事情，呢個毫無疑問等於同各位投資者講︰「唔使旨意炒人民幣升值，國家有其他辦法去解決雙順差問題。」
舊年溫總都曾經話過︰「今年內人民幣不會升值」，結果人民幣最終都要響舊年7月升值，今次唔知會唔會又爆冷呢？人民銀行講得好好聽，話係「人民幣滙率形成機制」，其實用簡單嘅廣東話講就係︰同美金脫鈎。溫總話𠵱家嘅人民幣係「根據市場需求變化有管理的浮動滙率制度」，用簡單嘅財經術語講就係︰奸矛操控浮動（DirtyFloat）。
滙率只有自由浮動同固定兩種，其他所有滙率模式都只會造成人為漏洞，俾炒家有機可乘。好似人民幣呢種奸矛操控嘅浮動，「人治」因素太重，太多機會俾人狙擊，所以人民銀行亦要揸極大量儲備，隨時準備開拖。
捍衞人民幣的購買力
人民幣嘅儲備，全部用嚟買美國國庫債券，結果就變成中國資助美國人民嘅福利，諗落都有啲荒謬。𠵱家人民幣嘅問題係已經有太過龐大嘅儲備，亦開始出現資金冇出路嘅現象。舊年開始出現有國家戰略性企業四出收購外國資產。
如果大家心水清就記得，日本人賺咗大筆大筆外滙，結果又大手大手買美國債券同資產，結果係點各位可以參考吓近代歷史書。
最重要嘅係，無論領導人有幾咁偉大，都有諗錯嘅時候。特別以貨幣政策嚟講，政府真係有好多機會去犯規。犯規者，濫發鈔票是也。其實自從中國改革開放之後，頭十幾年人民銀行唔單止係一個央行，仲要為國家福利機構提供資源，所以當時人民銀行印鈔機不斷開動，亦都令到通脹急升，最後就演變成政治動盪。溫總如果要史上留名，就唔應該將精力放晒響滙率問題上，更加重要嘅係捍衞人民手上鈔票嘅購買力，咁就已經夠佢留名千古。
利世民