香港政壇久未有新面孔，因此各界對即將出世嘅公民黨興趣甚大，組黨過程一舉一動都係新聞，日前有報道指公民黨已進行註冊，黨主席同黨魁人選已定，並拍板喺星期日舉行創黨大典。公民黨內唔少人處事作風一板一眼，對呢啲小道消息隨意流傳睇唔過眼，結果漏夜發出聲明澄清，話萬事要待會員大會通過先算數。
政壇小道消息有真有假，有啲屬惡意，有啲就無傷大雅，公民黨唔少黨員面對傳媒經驗豐富，對呢啲報道反應咁大確係令人意外。自稱非核心黨員形容，兩條路線正在鬥爭，有人認為發放消息應該謹慎啲，免得畀人以為放流料；亦有人覺得公民黨前身，即係45條關注組，人氣咁高，傳媒作用不可或缺，無理由組黨後玩封鎖……呢個問題喺個黨正式成立後能否解決，遲啲先有分曉，暫時邊一派佔上風就好明顯嘞。
湯大狀承認黨內確有上述分歧，但從來無人提出要「捉鬼」搵爆料人，佢強調呢啲只係小事，唔會影響黨內團結。
傳真︰2623-9278
電郵︰[email protected]