田二少同黎仔喺訓導主任冬菇監視下，見完校長握完手仔，一場九龍火車革命暫時平息咗，焦點又跳番去邊個會做地車合併後個首領。
𠵱家為止，阿Jack蘇仲係大熱。大家見到阿Jack繼續問佢續約未？對地車合併首領個位有冇興趣？佢話續約未有決定，一有就公布，但另一個問題就扮聽唔到！
其實經已有極權威人士講過，佢老哥同李家二少爺經已斟掂數，加埋二少又強調8號仔管理層勁有Layer，所以華華都當咗佢唔走，但係一日未公布，一日都可以吊高嚟賣，畀人知道自己有價有市！點搞？不斷蒲頭，公司事事無大小都攬上身，再帶多幾頂帽，做吓公職咪得囉！
另一個更有效展現身價嘅方法，就係做多啲，將間公司做好啲。睇Jack哥噚日主持消委會同8號仔個結盟酒會，咁忙都搵到位向消委會主席陳家強（圖左）同葉局長葉澍堃（圖中），硬銷佢哋嘅3G電話，你話，二少點會捨得畀佢走？
大家都有眼睇，阿Jack入咗去之後，8號仔真係瓣瓣掂，淨係爭個股價未夠好睇，更重要係佢同二少呢個主席勁啱嘴形，一定唔會玩兵變！