昨日大陸地產股又再發威，富力地產（2777）公布靚靚業績，股價又創上市新高，升5.67％，收36.35元。
至於合生創展（754）獲美林唱好，股價升勢好似直升機，勁升12.2％，收16.10元，又係新高。
其餘嘅大陸地產股，如龍頭股中國海外（688）及傳緊阿媽有資產注入的越秀投資（123）亦錄得不俗升幅。
每股NAV0.653元
經紀黃就話可以留意沿海家園（1124），佢話呢隻係少數大陸地產股中，股價較NAV有折讓，所以有一定留意價值，只係隻股近日升得頗急，最好睇定啲至郁手。
沿海家園昨日急升12％，收0.465元，成交股數6702萬股，金額3108萬元，計落又係52周高位，但以每股NAV0.653元計，則股價仍有上升空間。不過，隻股較為冷門，唔係太多散戶認識，家陣買賣盤兩面均熟口熟面，似乎未成氣候。
慕容小初