現年三十四歲嘅無綫藝人吳家樂，下個禮拜日（十九日）就做「老襯」，同其士集團主席周亦卿千金、現年三十八歲嘅周蕙蕙註冊結婚，晉身豪門之家。
黑白禮服二揀一
一對準新人呢幾日忙於為婚事張羅，雖然男方最近接咗新劇《通天幹探》，但無綫特別通融，特准佢聽日開始放兩個禮拜婚假。馮仁昭噚日打電話畀家樂仔，問佢婚禮籌備成點，佢話：「呢幾日忙開會，忙搬屋，好多嘢搞。」
家樂仔話佢搵朋友訂做咗兩套禮服，一黑一白，睇吓到時着邊套靚仔啲先決定；至於未婚妻就搵咗時裝設計師鄭兆良做婚紗，仲玩神秘，家樂仔話：「佢點都唔肯同我講揀咗乜嘢款嘅婚紗，話到時註冊我咪睇到囉，佢話要保持神秘感，畀驚喜我喎！」
否認使費逾百萬
問家樂仔婚禮使費係咪預計最少七位數字？佢好鬼馬咁話：「我咁小型都要使成百萬就好大件事，娶老婆唔使咁貴。」話就話小型婚禮，不過排場絕對唔少得。
為咗可以畀多啲親友見證佢哋註冊呢個重要時刻，家樂仔一早請咗註冊官當日中午十二點會去位於金鐘嘅港島香格里拉酒店，幫佢哋主持婚禮。馮仁昭八到外借註冊官要事前申請許可證同出勤費，一共一萬五千八百蚊，咁嘅價錢就可以娶個靚女老婆，家樂仔應該覺得抵啩。不過，聽講呢位註冊官係家樂仔個姑丈，睇在親戚份上唔知有冇得收平啲呢？