許仕仁同太太許羅美美噚日傍晚喺維多利亞宮請遲來嘅新年酒會，呢場係第一場，嘉賓主要係政界、法律界、醫療衞生以及社福界。
六十個立會議員都有請，不過，唔係人人畀面，民主黨就只係派咗一個單仲偕單刀赴宴，民建聯最叠馬有成七、八個人到場，包括曾鈺成、譚耀宗同陳鑑林等，自由黨主席田少都住喺白加道，街坊街里都要聯絡感情，於是率領張宇人等幾位黨員嚟同肥龍飲杯。
四十五條關注組要開大會，本來唔得閒，但係湯家驊都逗留咗十分鐘。湯狀話，佢唔想外界誤會佢嬲咗政府，所以點都去一去同肥龍握握手表示善意，肥龍好關心佢哋組黨進展，湯狀就好坦白講，雖然大家喺政改問題上意見不同，但喺其他議題仍可合作，等新黨組成，雙方可以坐低好好傾吓喎。
爆料熱線：29290000、27860099
報料傳真：26239278
報料電郵：[email protected]