被大家稱為四叔嘅恒基主席李兆基，佢嘅投資眼光有幾勁相信都唔使華華講，之不過勁到連香港電王、中電主席米高嘉道理都要喺年報度認輸，就真係連華華都有啲奇。話說中電本靚靚05年度年報內，分別將中電、港燈、中煤同港元存款回報比較，睇吓邊樣勁啲。
假設大家喺95年起每年投資一千大元喺兩電、中煤及港元1年期定期存款上，喺10年後，即05年12月31日，成本一萬蚊，若果投資喺中煤度就變咗兩萬三，中電就變咗逾一萬九，港燈就輸少少，變成近萬九（見附表）。四叔亮麗地贏晒！
中電年報亦有講中電嘅管理層到底舊年𢭃咗幾多錢。佢哋嘅海外市場功臣之一、中電行政總裁包立賢，舊年有1280萬銀人工，足足加咗13%；執行董事及財務總裁謝伯榮，舊年就支咗920萬，係咁意加4個巴仙啦！
至於巾幗不讓鬚眉嘅中電控股常務董事阮蘇少湄，舊年人工就有成920萬，同中電財爺相同，但加幅就有成27個巴仙，唔怪得佢同政府Fight回報時咁落力啦！
李華華
讀者如有任何意見或報料，歡迎發送電郵至[email protected]。
