浸會大學今年慶祝五十周年，班浸會人認真落力，南加州校友會自己出錢由美飛返嚟香港，帶埋戲服本周六喺大學會堂演出粵劇頌金禧，有興趣校友快啲去買飛捧場啦。
負責五十周年校慶校友活動嘅梁永祥噚晚同副校長范耀鈞向傳媒介紹年內慶祝活動，包括三月二十五日有個光輝五十浸大情，歡迎啲校友回校參觀話當年，夜晚重有個半世紀盆菜盛宴，前任校長謝志偉同名嘴校友林旭萍同林超榮都會出席，校友有興趣，仲可以喺二十六號去珠海一遊睇吓聯合國際學院。
校友聚頭，不免講吓當年校園生活，梁永祥係七八年英文系畢業生，當年浸大學費好貴，好多學生都要做兼職甚至全職，梁當年就係日頭返浸會，下晝六至十二點去美國運通做信用卡，幫人聽電話核對資料，結果四年畢業後，第一份工就係運通信用卡部阿頭，之後去咗渣打，𠵱家仲做咗恒生總經理，睇晒個人理財同財富管理業務，真威。
爆料熱線：29290000、27860099
報料傳真：26239278
報料電郵：[email protected]