童年分離姊妹情淡<br>我未成年：汶錡、麗淇爭食篤爆膽童年分離姊妹情淡
我未成年：汶錡、麗淇爭食篤爆膽
名模周汶錡（Kathy）與妹妹周麗淇（NiKi）在娛圈並肩作戰，不過小時候因為分開住，所以兩姊妹感情不算深厚。Kathy自言小時候較cool，不多話也不愛笑，倒是妹妹天生一雙大眼睛，人見人愛。不過兩姊妹有共同嗜好，就是吃。有次婆婆給錢她們落街買碗仔翅，一返家兩姊妹跟弟弟齊齊搶食，更激烈得連湯壺的內膽也篤破！
名模周汶錡（Kathy）出生於小康之家，每天最開心的事，就是等待媽咪放工，帶比她小一歲的弟弟和妹妹周麗淇，一家人坐街邊食車仔麵篤魚蛋。Kathy說：「我細個好多童年回憶都係同食有關，最記得有次婆婆畀咗唔知兩蚊定五蚊，我哋拎住個紅色暖壺落街買碗仔翅，返嚟搶住食，仲食到隻湯匙篤爆個壺嘅內膽，好誇張！」
想當白衣天使
Kathy表示因為妹妹周麗淇小時候跟婆婆住，所以兩姊妹感情不算十分深厚，反而跟弟弟更親近，經常在家一起玩煮飯仔，當然也少不了打架。她說：「我自細份人好cool，唔鍾意笑，唔鍾意講嘢，但就好鍾意做嘢，細細個喺託兒所，人哋瞓覺我就唔瞓，走去幫啲小朋友冚被，所以細個志願想做白衣天使或者幼稚園教師。妹妹就sweet啲，大眼妹咁，人見人愛，佢細細個就好有表演慾，𠵱家入行做藝人都啱。」
被嘲牛高馬大
妹妹自小表演慾強，Kathy就貪靚，才四、五歲已開始為自己做styling，還懂得反手紮辮仔返學。Kathy又謂小時候曾因為比同齡小朋友較高而非常自卑，她說：「我六歲讀一年班，就俾人以為讀三四年班，成日排最尾、坐最尾，又笑我牛高馬大，好自卑呀！」
採訪：林妙萍
部份圖片提供：周汶錡
5歲貪靚大姐
「我好貪靚㗎！四、五歲開始就自己揀裙仔着，連頭髮都要自己紮，用乜嘢款式嘅夾仔、頭飾都自己襯埋。我仲好叻紮辮，可以自己反手紮五手辮，有次由頭頂紮到斜角落膊頭，老師話：『你返學定做騷？』揀衫我都好堅持㗎，如果嗰啲衫我唔鍾意，我會扭計唔出門口，屋企人都冇我符。」
6歲高妹自歎
「我自細就高過其他同學，我唔鍾意㗎！最憎成日俾人以為我好大個，六歲嗰陣就似八、九歲。我記得讀一年班嗰陣，人哋見我高過同學成半個頭，甚至一個頭咁多，就以為我讀三年班。嗰時成日坐最尾，排隊又排最尾，好自卑㗎，真係好想試吓坐第一行。」
10歲舞林高手
「細個嗰陣好唔鍾意講嘢，但記性好，又鍾意活動，媽咪就安排我學跳舞。本嚟係跳芭蕾舞，又怕腳粗，就改跳中國舞。跳中國舞幾好㗎，可以鍛煉到啲手手腳腳、關節好柔軟。我六、七歲已經上台表演，每年都代表學校同中心去大會堂表演兩次。表演慾？冇乜㗎！」
11歲姊弟相依
「細佬（右）細我一歲，又有哮喘，不過佢好man㗎，好保護我同Niki（左），你睇佢搭住我膊頭就知啦。我哋好friend㗎，讀同一間小學，一齊返學放學。爹哋媽咪返工嗰陣，我就同細佬相依為命，有時佢煮麵畀我食，我又煮粉仔畀佢食。因為我哋住私人樓，家教又嚴，冇得好似屋邨啲小朋友咁喺走廊玩跳飛機、跳橡筋繩，所以閒來冇事就打吓交，亂玩一輪。」
27歲姊妹同行
周汶錡（右）入行多年，早已晉身為香港五大名模之一，妹妹周麗淇（左）亦緊隨其後，入行做model。兩姊妹更不時一齊出騷，互相照應，可謂上陣不離親姊妹。這張照片攝於○一年，當時周麗淇仍未正式投入娛圈。